تكملة لحلقات " أنا مش بتاع جواز " واللى بدأها معاكم الأخ / مصطفى الجندى
كان ليا الشرف أن أنزل معاكم الحلقة الثالثة ........ من أنا " مش بتاع جواز "
ولما كانت البدايات باللغة العامية وكلامنا كلام قهاوى ( على القهوة ) حبيت أنى أتكلم معاكم بنفس المنهاج
ولما اتفقنا إننا نتكلم عن مراحل الحب من أول التفكير إلى ما بعد الزواج .. والحال اللى وصلنا من تفكير وثقافة فى الموضوع دا
هبدأ معاكم بأول مرحلة وهى التفكير فى الحب نفسه والزاى الشباب ( اللى هو احنا ) بنكون متسرعين فى المرحلة دى
ودى مرحلة زى ما نقول كده " رسم الخيال من خلال شاشات التليفاز "
يعنى كل بنت وولد بيعيش مع الأفلام والمسلسلات حتى الأغانى والكليبات بيعيش فيهم بخياله وبيرسم بعدها صورة لفتاة أحلامه ( أو العكس مع البنت ) وصورة لمستقبله الرومانسى المليء بالسعادة التى لا تنغصها ظروف الحياة
وطبعاً علشان هو اللى راسم الصورة عايزها أحلى صورة ومافيهاش ولا غلطة ولا حتى مشكلة , طبعاً زى المخرج ما راسم المسلسل والفيلم وحالل كل المشاكل فيه
دا غير إن دا بيزود الرغبة الرومانسية عند كل فرد علشان يسرع من قصة الحب اللى المفروض يعيشها ,, يعنى مش معنى تيمور وشفيقة - حسن ونعيمة - سهر الليالى
نلاقى الولد والبنت وهما فى الثانوية ( واحتمال وهما فى الاعدادى ) متلاهفين وعندهم حب حوض تجربة والسلام ( أى تجربة ) فقط لإشباع الرغبة الرومانسية التى تركتها الأفلام وغيرها
وطبعا استحالة تكون الرغبة الرومانسية .. هى الكفيلة وحدها بدون المسئولية والتربية والدين للدفع ناحية الجواز كمجمل .. الزواج كيان يمثل الحب فيه جزء مهم ولكن ليس حجر الأساس
ويكون ناتج ( إنهم راسمين صورة خيالية ( بدون عيوب ) ومستعجلين فى تحقيقها ) نتوقع النهاية إيه ؟
طبعا فى معظم الأحوال فشل ثم فشل ثم فشل ( ويجرب غيرها على طوول .. ناس مش فاضية بقى )
ونلاقى اليومين دول كل واحد مر بكذا تجربة وكذا مرحلة من الحب . يعنى ارتبط كذا مرة قبل كده لحد ما طلعت عندنا ثقافة جديدة اسمها ثقافة الارتباط
وطبعا دى مصيبة كبيرة ......... لأن غالباً بتنتهى بفشل
ويحضرنا هنا قول الإعلاميين أن خوض الإنسان تجربة الارتباط هى تجربة مهمة حتى تكسبه تجارب الحياة
ولكن دعونا أحكى لكم قصتين ... ومن الأول القصتين أخرهم فشل ( بس فشل عن فشل يفرق طبعا )
قصة الفشل الأول : أن إنسان عمل بنصيحة الإعلام وعود نفسه أن يدخل فى كذا تجربة عاطفية حتى بدون حسابات عقلية ولا حتى دينية ( مااحنا قولنا تسرع ومجرد اشباع ) .. علشان يستفيد طبعا ولما تفشل ينقل على غيرها وتفشل وينقل على غيرها ... لحد ما عقل خد خبرة جامدة جدا بس للأسف فى المقابل اعتاد قلبه على الفشل وأصبح هين عليه أن يترك بمنتهى السهولة .. تعتقد دا لما يوصل لمرحلة الجواز والحب الذى يحويه ( الدين والمودة والرحمة ... وقلبه بالشكل دا ___ ياترى هيستمر )
والقصة الثانية : هو إنسان يرضى دينه وعقل فى كل شىء .. قبل أن يخوض فى موضوع من هذا يحسبها بنسبة عالية ( دينية وعقلة ودنياويه والظروف المحيطة ) .. لحد ما يوصل لمرحلة خطوبة ___ شاءت الظروف بعد عناده لها ومحاولة حلهاو بعد ان أحب فتاته أن لا يقدر الله لهم الزواج فشلت التجربة ولكنه تعلم منها كيف يواجه الظروف وكيف يرضى بقضاء الله وغيرها وكيف يزيد من حساباته فى كل مرة ( وان كنت اشك أن هناك العديد من المرات )
فهذا هو الفارق ................ وهكذا نريد أن نحسبها صح لنعش صح
وعلشان لما حد يقولنا أنت لحد دلوقتى ما ارتبطش ليه ؟ ...........
تكون الإجابة منتهى البساطة والبفم المليان .. إذا كان دا معنى الارتباط فعفوا " أنا مش بتاع جواز "
وهنا أحضرنى قول الكاتب " غذاء الروح L'Amour .. والعشا سبانخ "
